Friday, September 18, 2020
Home > प्रवास > बिदेशमा नेपालीलाई यस्तो सास्तीः स्वदेश फर्किने लिष्टमा नाम छ, साथमा टिकट छैन!!

बिदेशमा नेपालीलाई यस्तो सास्तीः स्वदेश फर्किने लिष्टमा नाम छ, साथमा टिकट छैन!!

दोहा— खाडी मुलुकहरूमा रहेका नेपाली दूतावासहरूले कोरोना भाइरस महामारी लगायत अन्य कारणले समस्यामा परेर स्वदेश पठाउन नेपाल एयरलाइन्स र हिमालय एयरलाइन्सका उडान तालिका सार्वजनिक गरे पनि यहाँ स्थित नेपालीहरूले टिकट पाउनै सकस भएको गुनासो गरेका छन् । झण्डै सात महिनादेखि रोजगारी गुमाएर साउदी अरबबाट स्वदेश फर्किने दिनको पर्खाइमा रहेका अर्घाखाँचीका विशाल कार्कीकाे यस्तो बहाल छ ।

विशाल कार्कीले भने, ‘बल्ल बल्ल दूतावासले सार्वजनिक गरेको लिस्टमा नाम त आयो तर के गर्नु टिकट नै पाइँदैन ।’ टिकट खरिदका लागि ट्राभल एजेन्सीमा पटक पटक बिहानदेखि लाइनमा बसे पनि बेलुका रित्तोहात फर्किनु परेको उनले बताए । आफू बिरामी पनि रहेको उनको भनाइ छ । साउदी अरबबाट स्वदेश फर्किन टिकटको खोजीमा भौँतारिएका खोटाङका धनकुमार राईका अनुसार हवाई टिकटको उचित व्यवस्थापन नहुँदा हजारौँ नेपालीहरू निराश बनेका छन् ।

स्वदेश फर्किन लागेका अधिकांश नेपालीहरू हवाई टिकटका लागि चर्को घाममा लाइन बस्न बाध्य छन् । दूतावासहरूले टिकटका लागि सम्बन्धित एयरलाइन्सको ट्राभल्स एजेन्सीसँग सम्पर्क गर्ने भने पनि उचित व्यवस्थापन नभएको धनकुमारको भनाइ छ । कतारमा रहेका नेपालीहरूले पनि टिकट नपाएको गुनासो गरेका छन् ।

दूतावासले स्वदेश फर्किनै पर्ने भनेर सार्वजनिक गरेको नामावलीमा नाम परेको भए पनि टिकट नपाएको उनीहरूको भनाइ छ । स्वदेश फर्किन तयार रहेका नेपालीहरूलाई टिकटको व्यवस्था गर्न समस्या भएको छ । कतै टिकट पाइहाले पनि नेपाल सरकारले तोकेको मूल्यभन्दा चार गुणासम्म बढी लिने गरेका छन् ।

यति बेला स्वदेश फर्किन चाहने नेपाली श्रमिकहरू धेरै भएको तर उडान संख्या कम भएकोले पनि टिकट पाउन सकस भएको दूतावासका अधिकारीहरूले बताउने गरेका छन् । खाडीमा कोरोना भाइरसका कारण रोजगारी गुमाएर अलपत्र परेका नेपालीलाई घर फर्किन सहजीकरणका लागि नेपाल सरकारले ध्यान दिन जरुरी छ ।-समाचारका भिडियो हेर्न तल क्लिक गर्नुहाेस्***

Leave a Reply

error: Please Dont Copy My Content!! !!