Wednesday, October 21, 2020
Home > प्रवास > समुन्द्रमा डुबेर झण्डै ज्यान गएन एक नेपालीको! को थिए तिनी? हेर्नुस्

समुन्द्रमा डुबेर झण्डै ज्यान गएन एक नेपालीको! को थिए तिनी? हेर्नुस्

काठमाडौं। बेलायतमा समुद्रको छालमा फसेका एक नेपालीको समुद्र किनार घुम्न गएका पर्यटकहरुले निकै कठिन परिश्रम गरेर उद्धार गरेका छन् । उनको उद्धारको कथा कुनै फिल्मको भन्दा कम छैन । इङल्याण्डको जुरासिक कोस्टमा रहेको डर्डल डोरमा एक नेपाली समुद्रको छालमा फसेका थिए ।उनलाई त्यहाँ समुद्र किनारमा रमाइलो गर्न गएका पर्यटकहरुले मानव साङलो बनाएर उद्धार गरेका थिए । बेलायती अखबार डेलीमेलले एक प्रत्यक्षदर्शीलाई उद्धृत गर्दै छालमा फसेका व्यक्ति नेपाली भएको भनेको छ तर उनको पहिचान खुलाइएको छैन ।

डर्डल डोरमा समुद्र किनारको डोरसेट ल्याण्डमार्क नजिकै ती युवा पौडी खेलिरहेका थिए । अचानक त्यहाँ समुद्रको छाल आयो र उनले संघर्ष गर्न थाले । उनी पौडिएर बाहिर आउन प्रयास गरे तर छालले उनलाई झनै समुद्रतिर धकेलीरहेको थियो । २० माइल प्रतिघण्टाको गतिमा आएको तुफानले उनलाई बाहिर आउन दिइरहेको थिएन । छालहरुले उनलाई टाउकोमाथिबाट नाघिरहेका थिए । अन्ततः छालसंग संघर्ष गर्न नसकेपछि उनले सहयोगको लागि चिच्याउन थोका थिए ।

उनले सहयोग मागेपछि समुद्र किनारमा घुम्न गएका करिब ३० जना पर्यटक समुद्रतिर दौडिए र एक अर्काको हात समाएर मानवसाङलो बनाए। उनीहरु एक अर्काको हात समाएर ती युवाको नजिकै पुगेपछि बडीबोर्ड र लाइफगार्ड डोरी फ्याँकेर उनको उद्धार गर्ने प्रयास गरे ।

उद्धारकै क्रममा अर्का एक युवाले उनको झनै नजिक जाने प्रयास गरे तर उनी आफैं समुद्रको छालमा फसे । उद्धार गर्न गएका युवासमेत छालमा फसेपछि करिब २ मिनेटको संघर्षपछि अन्ततः मानवसाङलोले दुवैलाई सुरक्षित बाहिर तान्न सफल भयो ।

प्रत्यक्षदर्शी एमिली फूटेका अनुसार उनी बिहान ९ बजे समुद्र किनार पुग्दा ती युवा समुद्रमा पौडी खेलिरहेका थिए । उनी त्यहाँ पानीमा खेलिरहेका थिए । मध्य दिउँसोतिर हावाको बहाव तीब्र भयो र समुद्रमा छाल उठ्न थालेपछि उनी त्यहाँ फसेर छालसँग संघर्ष गर्न थाले ।उनी बाहिर निस्कनै लागेका थिए तर अचानक छालले उनलाई उछिन्यो र उनी बाहिर निस्कन सकेनन् । संघर्ष गर्दा नसकेपछि अन्ततः उनले सहयोगका लागि बाहिर बसेका मानिसहरुलाई गुहारेका थिए ।

‘बाहिर रहेका मानिसहरुले तत्काल मानव साङलो बनाए तर उनीहरुलाई पनि छालले हानिरहेको थियो’ उनले भनिन् ‘एक समय त मलाई लाग्यो हामीले समुद्रमा एउटा होइन १० जनाले ज्यान गुमाउनेछौं ।’ उद्धार गर्न गएकाहरुले ती युवातर्फ विभिन्न वस्तुहरु फलिरहेको भए पनि उनले समाउन नपाउँदै छालले हुत्याइदिएको उनले बताइन् । यही बीचमा अर्का एक युवा उद्धारको लागि उनीतिरै जाँदा आफैं छालमा फसेको उनले बताइन् ।

अर्का प्रत्यक्षदर्शी जिनेट वारेनले भने ‘सुरुमा केही समय उनी आत्मविश्वासपूर्व पौडिइरहेका थिए तर केही समयपछि एउटा ठूलो छाल आयो र उनलाई हुत्याइदियो ।’ ती दुवैलाई उद्धार गरेर बाहिर ल्याएपछि त्यहाँ सुनिएको खुसीको स्वरले राहत दिएको उनले बताए ।

अर्का प्रत्यक्षदर्शीले नाम नबताएरै डेलीमेलसँग भने ‘त्यो दृश्य निकै डरलाग्दो थियो र मैले इमरजेन्सीसहित धेरैलाई फोन गरें ।’ उनी करिब २० मिनेटसम्म त्यहाँ फसेको उनले बताए ।

‘म निश्चित छु ती युवा नेपाली थिए र मैले थाहा पाएअनुसार उनी आफ्नो परिवारसँग थिए’ उनले भने ‘पारामेडिकहरुलाई त्यहाँ आइपुग्न करिब ३० मिनेट लाग्यो । नियमित जाँचपछि उनीहरु साथमै गए ।’ ती युवा हिँडेरै गएकोले उनी ठिक रहेको आफूलाई लागेको उनले बताए । यो घटनापछि त्यहाँका कोस्टगार्डले यस क्षेत्रमा सुरक्षा चेतावनी जारी गरेका छन् । पछिला वर्षहरुमा त्यहाँ केही मृत्यु भएकोले त्यस क्षेत्रमा पौडी नखेल्न आग्रह गरिएको छ ।

Leave a Reply

error: Please Dont Copy My Content!! !!