Saturday, November 27, 2021
Home > समाचार > साढे ३३ किलो सुन प्रकरण पुग्यो यस्तो अवस्थामा ,तस्कर समूहले प्रहरीलाई दियो यस्तो सनसनी पूर्ण बयान – बयान सहित !

साढे ३३ किलो सुन प्रकरण पुग्यो यस्तो अवस्थामा ,तस्कर समूहले प्रहरीलाई दियो यस्तो सनसनी पूर्ण बयान – बयान सहित !

साढे ३३ किलो सुन तस्करीका नाइके चूडामणि उप्रेती ‘गोरे’ले आफ्नो सुन लुकाएको आरोपमा चारजना पूर्वसहकर्मीलाई मोरङको जंगलमा पुर्‍याएर यातना दिइरहेका थिए । उनलाई पिछा गर्दै मोरङको पोखरिया पुगेको प्रहरी टोलीले ‘रणनीतिक’ रूपमा फोनमा गरेको सम्झौताअनुसार गोरे मध्यरातमा मोरङको पोखरिया आउन तयार भएका थिए ।

सम्झौताअनुसार पर्खिरहेको प्रहरी टोलीका अगाडि आएर स्कर्पिओ गाडी रोकियो । तर, गोरे आएनन्, बरु गाडीमा उनका सहयोगी सनमको शव आयो । गोरेले करेन्टसहित दिएको यातना सहन नसकेर सनमको मृत्यु भइसकेको थियो ।

सो गाडीका चालक काभ्रेका टेकराज मल्ल मात्र होइन, उनको सहयोगमा पक्राउ परेका मोरङ उर्लाबारीका कृष्ण भनिने नरेन्द्र कार्की र मोहन काफ्लेसँग प्रहरीले बयान लियो । सुन लुकाएको आरोपमा उनीहरू पनि सनमसँगै बन्धक बनाइएका थिए । स्रोतबाट प्राप्त बयानको समग्र विवरणः

गत ७ माघमा दुबईबाट आएको साढे ३३ किलो सुन विमानस्थलको भन्सार र सुरक्षा संयन्त्र छलेर बाहिर आइपुग्यो । यसरी सुन ल्याउने प्रक्रिया गोरेका लागि सामान्य थियो । अवैध सुन भरियामार्फत भारत पुर्‍याउने गरिन्थ्यो ।

त्यो दिन आएको साढे ३३ किलो सुन विमानस्थलबाट सहरसम्म ल्याउने जिम्मा थाई एयरवेजका कर्मचारी पुण्यप्रसाद लामा, लालबहादुर मगर र सानु बनको थियो । उनीहरूले मोटरसाइकलको तेल ट्यांकीमा राखेर पटक–पटक खेप गरेर अनामनगरस्थित एउटा घरमा पुर्‍याए ।

अब ट्यांकीबाट निकालेर सबै सुन झोलामा राखी किराना पसलजस्तो स्थानमा पर्खिएका भरियालाई दिनुपर्ने थियो । तर, पसलमा लग्न सानु बनले बोकेको सुन एकाएक गायब भयो । र, त्यहीँबाट सुरु भयो यत्रो सुनको महाभारत ।

सुन बुझ्नुपर्ने सनम शाक्य भने ठमेलतिर होटलमा मस्तीमा थिए । सुन आउँछ भनेको ठाउँमा नपुगेपछि गोरेले सनमलाई फोन गरेर कहाँ छस् भने । सनमले उर्लाबारीमा छु भनेर ढाँटे । तर, पछि कुरो बुझ्दा सनम काठमाडौंमै भएको खुल्यो ।

त्यसपछि सनम गोरेको शंकामा परे । तर, सनमले भने सानु बनलाई शंका गरे । यता, गोरेले सानुलाई सिन्धुलीको खनियाखर्कमा ल्याएर सुन कसले लग्यो भन्दै केरकार गरे । भुजुङ गुरुङले सुन गायब बनाएको जवाफ सानुले गोरेलाई दिए । गोरे बुझ्न लागे । तर, भुजङले गायब पारेको पुष्टि भएन । अन्ततः सानुले नै गायब पारेको निष्कर्षमा गोरे पुगे ।

सानुमाथि गोरेको शंका

गोरेको निष्कर्ष थाहा पाएपछि सानु केही दिन डरले गायब भए । तर, शंका झन् बढ्ने भएकाले उनी एयरपोर्टमा देखा परे । तर, त्यही दिन ट्यांकरमा ठोक्किएर उनको ज्यान गयो ।

अनुसन्धानमा सामेल गरिएको सिसिटिभी फुटेजमा सानु आफैँ ठोक्किएर आत्महत्या गरेको देखिएको प्रहरीले बताएको छ । तर, उक्त ट्यांकरका चालक माइला सार्की भने फरार छन् ।

सानुको मृत्युपछि सनमतिर गोरे

सानुको मृत्युपछि गोरेले सुन सनमले गायब पारेको भन्दै खोजबिन थाले । सनम डरले भागेर आसाम पुगे । तर, भेट्न नआएमा उर्लाबारीमा भएका आमाबुवा श्रीमती सबैलाई सखाप पार्ने धम्की गोरे समूहले दियो ।

सनमले गोरे समूहलाई पश्चिम बंगालको सिलिगुडीमा भेटेर सुन आफूले गायब नबनाएको स्पष्टीकरण दिएका थिए । सनमलाई गोरे समूहले यातना दिएर सोधपुछ गर्दै निश्चित समयभित्र सुन नल्याए ठीक नहुने धम्की दिएको थियो । तर, सनमले सुन भेट्न सकेनन् ।

नरेन्द्र र मोहन पनि तानिए

भाका नाघेपछि गोरेका भारतीय गिरोहका सदस्य उस्ताम मियाँलगायत नेपाल आएर सनमसहित उर्लाबारीका नरेन्द्र कार्की र मोहन काफ्लेलाई नियन्त्रणमा लिएर अनुसन्धान थाले । नरेन्द्र र मोहन पनि सुन लिन काठमाडौं जानुपर्ने भरिया थिए ।

तर, उनीहरू काठमाडौं गएका थिएनन् । १४ फागुनदेखि गोरे समूहले सनम, नरेन्द्र र महेन्द्रलाई नियन्त्रणमा लिएर सिरहाको लहान पुर्‍याई बन्धक बनायो । पछि यातना दिँदै धरानको निर्वाण कन्ट्री क्लबको गेस्ट हाउसमा लगेर सोधपुछ गरियो ।

त्यहाँ एयरवेजका कर्मचारीहरू पुण्यप्रसाद लामा र एलपी भनिने लालबहादुर मगरलाई पनि सँगै राखेर यातना दिइएको थियो । तर, पछि उनीहरूलाई दोषी नभएको ठहर गर्दै काठमाडौं फकाइयो ।

सनम, नरेन्द्र र महेन्द्रमाथि यातना

सनम, नरेन्द्र र महेन्द्रमाथि यातनाकेन्द्रित गरियो । पोल नखुलोस् भनेर गोरेले उर्लाबारी–१ स्थित कान्छीचोक क्षेत्रमा रहेको जंगलमा लगेर यातना दिए । जिपको ब्याट्री निकालेर तार जहान गरी आपसमा करेन्ट लगाउन लगाई बयान लिएका थिए ।

त्यहाँ उस्ताम, चालक टेकराज मल्ल ठकुरी, गोरे , नरेन्द्र , महेन्द्र र सनमसहित करिब ८ जना थिए । गोरे समूहले नरेन्द्र, मोहन र सनमलाई दुई दिनसम्म जंगलमा लगेर यातना दियो । दिनभर पिकनिक खान आएकोजस्तो बनाएर रक्सी खुवाउँदै एकले अर्कालाई करेन्ट लगाउन लगाएर यातना दिए । सोही क्रममा सनमको मृत्यु भयो ।

विगतको पोल खुल्ने डरले भगाइयो गोरेलाई

नेपाल प्रहरीका पूर्वडिआइजी गोविन्द निरौलाले विगतमा गरिएका सुन तस्करीको पोल खुल्ने डरले गोरेलाई भगाएको गृहका सहसचिव पौडेलको संयोजकत्वमा गठित समितिको अनुसन्धानको निष्कर्ष छ ।

२० पुस ०७३ मा त्रिभुवन विमानस्थलको गोल्डेन गेटबाटै बरामद भएको ३३ किलो सुन तस्करीमा निरौलाको संलग्नता आशंका गरिएको थियो ।

नेपाल प्रहरीको केन्द्रीय अनुसन्धान ब्युरो (सिआइबी)का तत्कालीन डिआइजी नवराज सिलवालको टोलीले उक्त सुन बरामत गरेको थियो भने त्यतिवेला निरौला विमानस्थलको सुरक्षा गार्ड प्रमुख थिए ।

घटनामा संलग्न भएको भन्दै सुरक्षा गार्ड उपप्रमुख एसएसपी श्याम खत्रीलाई सिआइबीको टोलीले समाते पनि निरौला भने जोगिएका थिए ।

सिआइबीले त्यसवेला गरेको अनुसन्धानले पनि उक्त सुन गोरेकै रहेको देखाएको थियो । सिआइबीले गोरेलाई फरार सूचीमा राखेको थियो । उक्त तस्करी काण्डमा गोरे अझै सिआइबीको फरार सूचीमा छन् ।

गृह स्रोतका अनुसार उक्त सुन विमानस्थलका तत्कालीन डिआइजी निरौला, एसएसपी खत्री, एसपी विकासराज खनाल र डिएसपी सञ्जय राउतको सेटिङमा तस्करी गरिएको थियो ।

निरौला र खत्रीसँगै एसपी खनाल र डिएसपी राउत पनि विमानस्थलमै कार्यरत थिए । गोरे पक्राउ परे त्यसवेलाको पोल खुल्ने र सबैजना फसिने डरले साढे ३३ किलो सुन काण्डमा पनि सूचना चुहाएर गोरेलाई भगाएको गृह स्रोतको दाबी छ ।

के हो गोल्डेन गेट ३३ केजी सुन प्रकरण ?

२० पुस ०७३ मा विमानस्थलको गोल्डेन गेटबाट पार गराउँदै गरेको अवस्थामा ३३ केजी सुन बरामद भयो । एयर अरेबियाको जहाज प्रयोग गरी उक्त सुन दुबईबाट ल्याइएको थियो । सुन बोकेर आएका थिए, गोपालबहादुर शाही । प्रहरीले शाहीलाई पनि पक्राउ गर्‍यो ।

उनकै बयानका आधारमा विमानस्थल सुरक्षा गार्ड एसएसपी खत्रीसहित दीलबन्धु थापा, सन्तोष काफ्ले, रामहरि कार्की, श्रीनारायण यादव, राजकुमार ढकाल, श्यामकृष्ण श्रेष्ठ, राजेश शाक्य, सुनील श्रेष्ठ, सपन श्रेष्ठ, मनोज श्रेष्ठ पक्राउ परे ।

तर, सुन तस्करका नाइके फरार रहे । सिआइबीको अनुसन्धान प्रतिवेदनअनुसार उक्त सुनको मुख्य लगानीकर्ता गोरे थिए । तस्करीको योजना भने हरिशरण खड्का, रोशनगुप्तलाल भुसाल, रञ्जन पन्त, राजनप्रसाद पन्त र अर्जुनप्रसाद खरेलले बनाएका थिए ।

यीमध्ये प्रहरीले कसैलाई पनि पक्राउ गर्न सकेन । दुबईमै बस्दै आएका पाँचविरुद्ध प्रहरीले रेडकर्नर नोटिस जारी ग¥यो । तर, गोरेलाई भने त्यसवेला रेडकर्नर नोटिस जारी गरिएको थिएन ।

यसरी थाहा पाए निरौलाले गोरे पक्राउ गर्न लागेको प्रहरीको सूचना

त्रिभुवन अन्तर्राष्ट्रिय विमानस्थल सुरक्षा प्रमुखबाट हटाइएपछि निरौला प्रहरी प्रधान कार्यलयस्थित अन्वेषण ब्युरो प्रमुख थिए । ब्युरो प्रहरी महानिरीक्षकको सचिवालयअन्तर्गत अपराध अनुसन्धान विभागअन्तर्गत रहन्छ । विभाग प्रमुख तत्कालीन एआइजी बमबहादुर भण्डारी थिए ।

भण्डारीलाई तत्कालीन प्रहरी महानिरीक्षक प्रकाश अर्यालले गोरे पक्राउको योजना बताएका थिए । गोरे पक्राउका लागि प्रहरीसँग समन्वय गर्ने जिम्मा पनि अर्यालले भण्डारीलाई दिएका थिए ।

सोही क्रममा भण्डारीले मोरङ जिल्ला प्रहरी कार्यालयसँग गोरे पक्राउ गर्न समन्वय गरिरहेका थिए । यसको सुइँको ब्युरोका तत्कालीन डिआइजी निरौलाले पाए । त्यसलगत्तै उनले प्रहरीको योजना गोरेलाई भने । र गोरेलाई भगाए ।

गोरेको डरले आसाम पुगेका सनम बाबुआमा र परिवार सखाप पारिदिने धम्कीपछि फर्किए

दुबईबाट विमानस्थल आएको साढे ३३ किलो सुन विमानस्थलबाट अनामनगर पुग्नासाथ हरायो । गोरेले शंका आफ्नै पूर्वसहकर्मी सनम शाक्यलाई गरे । गोरेले पिछा गरेपछि डरले भागेर सनम आसाम पुगे ।

तर, भेट्न नआएमा उर्लाबारीमा भएका आमाबुवा, श्रीमती सबैलाई सखाप पार्ने धम्की गोरे समूहले दियो । सनमले गोरे समूहलाई पश्चिम बंगालको सिलिगुडीमा भेटेर सुन आफूले गायब नबनाएको स्पष्टीकरण दिए । तैपनि सुन खोज्ने जिम्मा उनैलाई लगाइयो ।

सुन नभेटिएको भनेर फेरि उनलाई नियन्त्रणमा लिएर मोरङको उर्लाबारीस्थित जंगलमा लगेर यातना दिन थालियो । १२ भोल्टको ब्याट्रीबाट करेन्ट लगाएर यातना दिँदा सनमको मृत्यु भयो । त्यसअघि एकजना र पछि अर्को गरी यो घटनासँग सम्बन्धित तीनजनाको मृत्यु भएको छ ।

डिआइजीसहितका प्रहरी अधिकारीलाई कर्तव्य ज्यान र संगठित अपराधको मुद्दा

साढे ३३ किलो सुन गायब प्रकरणमा मुछिएका प्रहरी अधिकारीमाथि मुद्दा चलाएर अनुसन्धान थालिएको छ ।

कर्तव्य ज्यान र संगठित अपराध मुद्दामा म्याद थपेर बहालवाला अधिकारीहरू एसपी विकास खनाल, डिएसपी सञ्जय राउत, सइ बालकृष्ण सन्जेल र सवारीचालक जवान सञ्जीव शाक्य तथा पूर्वडिआइजी गोविन्द निरौलामाथि अनुसन्धान सुरु गरिएको हो ।

कर्तव्य ज्यान र संगठित अपराधको मुद्दा लागेपछि बहालवाला अधिकारीलाई प्रहरी प्रधान कार्यालयले निलम्बनसमेत गरेको छ ।

गृह मन्त्रालयका सहसचिव ईश्वर पौडेल नेतृत्वको छानबिन समितिले निरौला, खनाल, राउत, सन्जेल र शाक्यलाई पक्राउ गर्न आदेश दिएको थियो ।

प्रहरीले निरौलालाई ११ वैशाखमै विराटनगर ल्याएर हिरासतमा राखेको थियो । सञ्जेल र शाक्यलाई १२ वैशाखमा ल्याएको हो ।

Leave a Reply

error: Please Dont Copy My Content!! !!