Tuesday, June 15, 2021
Home > जीवनशैली > सर्वसधारणकाे प्रश्नकै ओइरोः कहाँ छिन हिमानी? पूर्वयुवराज पारस शाहकाे अस्पतालमा अझै यस्तो छ अवस्था!

सर्वसधारणकाे प्रश्नकै ओइरोः कहाँ छिन हिमानी? पूर्वयुवराज पारस शाहकाे अस्पतालमा अझै यस्तो छ अवस्था!

काठमाडौं । सोमबार दिउँसो हृदयघात भएका पूर्वयुवराज पारस शाहको राजधानीको नर्भिक अस्पतालमा उपचार भइरहेको छ। चिकित्सकहरूले मुटुको ब्लकेज खोलिए पनि उनको अवस्था स्थिर तर अझै गम्भीर भएको बताएका छन् । सोमबार दिउँसो हृदयघात भएका पूर्वयुवराज पारस शाहको राजधानीको नर्भिक अस्पतालमा उपचार भइरहेको छ। चिकित्सकहरूले मुटुको ब्लकेज खोलिए पनि उनको अवस्था स्थिर तर अझै गम्भीर भएको बताएका छन्।

ललितपुरको मंगलबजारस्थित कोपितेश्वर महादेव र हिरण्यवर्ण मन्दिरमा पूजाअर्चना गर्ने क्रममा अप्ठ्यारो भएपछि उनलाई सोमबार अपराह्न सवा ४ बजे नर्भिक अस्पतालमा भर्ना गरिएको थियो। यसअघि मन्दिरमा डेढ घण्टा बिताएका पारसलाई पञ्चकन्याले फूलमालाका स्वागत गरेका थिए। शाह मन्दिर पुग्दा स्वागत गर्न ललितपुरका मेयर चिरिबाबु मर्हजन समेत पुगेका थिए।

लामो अन्तरालमा सार्वजनिक स्थलमा देखापरेका पारसलाई हेर्न भीड जम्मा भएको थियो। पारस मन्दिरमा भने हँसिलो मुद्रामा थिए। पारसलाई हेर्न भीड जम्मा भएपछि प्रहरी परिचालन भएको थियो।

“छातीमा असह्य पीडाको महसुस भएपश्चात् पूर्वयुवराज पारस विक्रम शाहलाई आज अपरान्ह ४ः१५ बजे नर्भिकको आकस्मिक कक्षमा ल्याइएको थियो,” नर्भिक अस्पतालका कर्पोरेट कम्युनिकेशन आरपी मैनालीले जारी गरेको विज्ञप्तिमा भनिएको छ, “थोरै समय नर्भिकको अन्तर्राष्टिय आकस्मिक कक्षमा राखी जाँचपश्चात् उहाँलाई तत्कालै क्याथल्यावमा सारेर कोरोनरी एन्जियोग्राम गर्दा उहाँको मुटुको धमनी पूर्णरुपमा बन्द रहेको पाइएको थियो । उपरोक्त बन्द (अवरोध) खुलाउन कोरोनरी एन्जियोप्लाष्टी तथा स्टेन्ट प्रत्यारोपण कार्य सफलतापूर्वक सम्पन्न भई उहाँलाई सी.सी.यु.मा सारिएको छ ।”

उनको उपचारमा प्रा.डा. यादवदेव भट्ट लगायत डा. जे.पी. जैसवाल, डा. नग्मा श्रेष्ठ, डा. सन्तोष श्रेष्ठ र एनेस्थेसियोलोजिष्ट डा. प्रज्वल श्रेष्ठको टोली संलग्न रहेको थियो । उनको स्वास्थ्य हाल स्थिर रहेता पनि उनी खतरामुक्त भने नरहेको अस्पतालले जनाएको छ । उनी केहीदिन अस्पतालमै रहनेछन् । रेखदेखका लागि बहिनी प्रेरणा खटिएकी छन् । पत्नी तथा पूर्वयुवराज्ञी हिमानी शाह भने थाइल्यान्डको बैंककमा छिन् ।

श्रीमतीसँग लामो समय छुट्टिएर बसेका उनी केही समययता भने परिवारसँग घुलमिल भइरहेका थिए। पूर्वराजा ज्ञानेन्द्र र पूर्वरानी कोमल भने अहिले सिमरामा छन्। पूर्वयुवराज शाहलाई हृदयघात भएपछि सिमरामा रहेको उनकी आमा तथा पूर्वरानी कोमल गाडीबाटै काठमाडौं आएकी छिन ।

हवाइ जहाजको टिकट नपाएका कारण उनी खबर पाउने बित्तिकै गाडीबाट काठमाडौं आएकी सिमरा इलाका प्रहरीका प्रहरी निरीक्षक सुवास हमालले जानकारी दिए। बुबा ज्ञानेन्द्र भने मंगलबार बिहान हवाइ जहाजबाटै आउने तयारी गरिरहेका छन्। प्रहरी निरीक्षक हमालका अनुसार भोलि बिहानका निम्ति पनि टिकट पाइएको भने छैन। ‘टिकट पाइएको छैन, तर बिहानको मिल्ला भन्ने आशा छ,’ हमालले भने।

कोमल र ज्ञानेन्द्र भ्रमणका निम्ति सिमरामा थिए। उनीहरू हिजो बुद्ध एयरबाट सिमरा गएका थिए।मध्य तराई र झापा भ्रमण गर्ने उनीहरूको कार्यक्रम थियो। यो भ्रमण करिब एक महिनाको तय भएको थियो। छोरा पारसको अवस्था यस्तो भएपछि उनीहरू काठमाडौं फर्किने भएका हुन्।

पारसले वर्ष दिनयता मुटुको औषधि खाएका थिएनन्
पारसलाई हृदयघात भएको यो पहिलोपटक होइन। यसअघि उनलाई कम्तिमा दुईपटक हृदयघात भएको थियो। तर, एक वर्षयता पारसले मुटु रोगसम्बन्धी कुनै औषधि खाएका थिएनन्। ‘उहाँले एक वर्षदेखि रोगसम्बन्धी कुनै पनि औषधि खानुभएको रहेनछ,’ अस्पताल स्रोतले भन्यो।

सन् २००८ मा पारसको दायाँ कोरोनरी धमनीमा ब्लकेज भएपछि ‘एन्जिओप्लास्टी’ गरेर ब्लकेज खोली स्टेन्ट हालिएको थियो। थाइल्याण्डमा रहँदा पनि सन् २०१३ फेब्रुअरीमा पारसलाई हृदयघात भएको थियो। उतै उपचार भएकाले त्यतिबेला उनलाई के-के समस्या भएको थियो भन्ने विस्तृत विवरण थाहा हुन सकेको छैन।

जुलाई २०१५ मा उनको बायाँतिरको धमनी (लेफ्ट एन्टेरियर डिसेन्डिङ) पनि ब्लकेज भएपछि नर्भिक अस्पतालमै भर्ना गरेर खुलाइएको थियो। मुटुमा रहेका मांशपेशी सञ्चालनका लागि हुने रक्तसञ्चार प्रणालीमा यी एलएडी (लेफ्ट एन्टेरियर डिसेन्डिङ) को भूमिका अहम् हुन्छ।

त्यही बेला पारसको छातीमा आइसिडी (इम्प्लान्टेबल कार्डियोभर्टर डिफिब्रिलेटर) राखिएको थियो। आइसिडीले मुटुको गति निगरानी गर्छ। गति अनियमित हुँदा विद्युतीय सिग्नल पठाएर नियन्त्रण गर्छ।

सोमबार दिउँसो अस्पताल ल्याउँदा पारसको एलएडी ब्लकेज थियो। जसमा सन् २०१५ मा पनि बन्द भएपछि स्टेन्ट हालिएको थियो। अस्पताल ल्याउँदा पारसको मुटुको इजेक्सन फ्र्याक्सन (मुटुले रगत पम्प गर्ने मात्रा) १५ प्रतिशत मात्र थियो। सामान्य अवस्थामा यो ६० देखि ७० प्रतिशतसम्म हुन्छ।

ब्लकेज खुलाएर स्टेन्ट्ट हालिसकेपछि अहिले उनको इजेक्सन फ्र्याक्सन २५ प्रतिशत पुगेको छ। हृदयघात हुँदा मस्तिष्क र अन्य अंगमा पनि असर पर्न सक्छ। पारसका कुन कुन अंगमा असर परेको छ भनेर सबै परीक्षण हुन बाँकी छ। ‘उहाँ होसमै भएकाले मस्तिष्कमा असर परेको छैन भन्न सकिन्छ,’ स्रोतले भन्यो।

पारस कसरी निको हुन्छन् भन्ने निर्धारण उनको इजेक्सन फ्र्याक्सन सुधार हुन्छ कि हुन्न भन्नेले गर्छ। उनको इजेक्सन फ्र्याक्सन राम्रो हुँदै गयो भने उनको अवस्था पनि सामान्य हुनेछ।

इजेक्सन फ्र्याक्सन २५ प्रतिशतकै हाराहारीमा हुँदा पनि मान्छे बाँचेका उदाहरण छन्। त्यसका लागि बिरामीले निकै अनुशासित जीवनशैली अपनाउनुपर्छ, जुन पारसले अहिलेसम्म अवलम्बन गरेका छैनन्।

Leave a Reply

error: Please Dont Copy My Content!! !!